زجلية = أنا وصحابي فروض زاهي / الجزء الثاني - تتمة

 

 

نبيل

شوفو نبيل همة وشباب          ديما حاضر مع لصحاب

كتكوت صغير دار مزية          فلموسيقى ما بين حباب

بانغام العود زاد هيامو            مأدب فنشادو ومصواب

هبة مرضية عند الله            ربي سبحانو اللي وهاب

****

ازاح

قالوا ازاح غيابو طال         لكن كريم ديما فلبال

ضربة ضربة للدربوكة            على جنب الساقية والشلال

هذا مقسوم هذا وحدة            ومصمودي وسال وسال

لا تغيب علينا بالمرة           راه الناس عليك تسال

****

ايت عربية

تحية لاية عربية          فيه الخير وعلى نية

ناطق ديما بالحكمة     ليها معنى ومنطقية

هنات قلوب بنشادو    بانغام جميلة صوفية

نابه ورزين ديما معقول  والنفس عزيزة مرضية

****

معاد

قالوا معاد جا فالميعاد    سموح لطيف..نور لبلاد

الى غنى تطرب الاسماع   وبنغامو تسعد لعباد

كيف الطير الى غرد        بين لغصان وجنب الواد

تهنا القلوب بفضالو     ومن جودو الى جاد

****

سندس

سندس مضيافه وفنانة                واللي يبغيها يبغينا

فلفايسبوك الى كتبات               جميع افكارها ترضينا

باللحن الراقي مولوعة                سخية وكريمة وحنينة

مول الخير عليه يبان                 نتمنى فضالو تروينا

****

صباح

اهلا وسهلا يا صباح         اللي شافك ديما يرتاح

عشقت أنا مسرحية         وانا فيها طاير صداح

يغرد ديما بشواقو           يلغي بلغاه هاتف مداح

يقول هو بلسان الحال     مولات الخير هي صباح 

****

غانيم

يونس غانيم آش جرى ليك    غيابك طال اش اللي بيك

سولنا عليك الكمان          هي تدري السر اللي فيك

لانغامك زادت اشواقي      واشواق الناس اللي تبغيك

دير البال دبر الاحوال       راه لقلوب تسال عليك

****

صفر

صفر ظرافة من الابرار    شانو عالي ومن الاخيار

الى كنت باغي تعرف     سل الميزان يعطيك خبار

مابين التيكة والدوما     وانغام جميلة بالمزمار

غرد الطير زاد هيامو     هبات نسام ..مالت الازهار

****

مريم

مريم فينك يابنت الناس         نية وصفا وزد الاحساس

زرت مرة وغبت مرات           الغايب حجتو هي اساس

حوال الدنيا كثيرة شلى           وهمومها توجع الراس

فيك مروة ولـــــــــــــــــطافة           تنسّي اللومة وتحد الباس

واليوم قلوبنا مرتاحة              حيث جات اخبارك من مكناس

****

ايوب

ايوب عشير وملحباب          أنيس فالجلسة مع الاصحاب

لوفا والحاجة مقضية               فحضورو كان ولا فغياب

على وجهو تبان الفرحة          وبوجودو تسعد لحباب

جود وخير وحب الناس          سل الفاهم يعطيك جواب

****

المجيدي

لمجيدي نبلغ سلام           بلسان محبة ووئام

على جبينو مرسومة            علامة الخير يا سلام

ديما صاموت والحق معاه    والصمت مزية يا كرام

سمعت الرق يلغي بلغاه         تهيج نقراتو لحمام

****

لبنى

لبنى فنانة ومرضية              مروة وحاجة مقضية

فتحت بوابها للتدريب        وعود عسلية وردية

هاجت شواقي للتطريب       وانغام جميلة فنية

مابين العشرة  واحبابك       وردة فجنانهم مجنية

****

نزهة

نزهة ونزاهة فيوم جميل      فاحت علينا بنسيم عليل

بعد الغيبة والهجران          هبات رياح وغصان تميل

فيها لطافة وظرافة           وحب الخير وطبع جليل

القلب كبير ماطال زمان       فكل صباح ونهار وليل

****

  وهمو

وهمُّو ناشط أو ودود       مابين لصحاب ديما معدود   

دعيت الله يسمح ليا       بعد النسيان ماشي مقصود 

صادق فعمالو ونية         وفلحزة ديما موجــــــــــود

ضربة فالدف منو تروي    قلب الملهوف بلا حدود 

*****

لهديدي

لهديدي قالوا مزيــــــــــان         فيه ظرافة وديما فرحان

  صوت جميل ما بين احباب           فيه رنة فايضة بلــــــحان

  نية وصفا من طبعو     وحب الخير عليه يبان 

  نتمنى لا يزيد فغيابو                راه لغياب سباب النسيان      

----------------------------------------

صــــــــــــــلاح  اهضير / بني مـــــــــــــلال في 20 .2015.11

 

https://www.youtube.com/audiolibrary_download?vid=e7b663e1ef93d9eb&feature=youtu.be 

التعليقات

التعليقات تحتاج لموافقة صاحب المدونة لنشرها.


استضافة مجانية من موقع مدونات عبر! | الموقع غير مسؤول عن محتويات المدونة، فقط صاحب المدونة يتحمل كامل المسؤولية عن مضامينها | التبليغ عن مخالفة | سياسة الخصوصية |نسخة الموبايل